Turkey-ah rorellai party-in majority nei pha lo

Turkey ram inthlanpui neih zawh takah, President Tayyip Erdogan-a kaih­hruai rorellai, AK Party chuan party malin seat la hnem ber mah se par­lia­ment-ah majority a nei pha dawn lo.

AKP hian seat awm zat aṭangin 40.8% a la a, mahse kum 2011-a inthlanpuiah khan 49.8% a la thung. Kum 13 chhunga AKP in majority a neih phak loh ṭum khatna a ni.

Party mala sorkarna a siam theih dawn tak loh avangin AKP hian thawhpui tur a zawng dawn a, inremna a siampui theih loh chuan Turkey hian inthlanpui an neih ṭhat leh a ngai dawn a ni.

Ṭangrual sorkar siam tura biak a tumte hi la sawichiang lo mah se, Pathianni zan khan right­wing Nationalist Move­ment Party (MHP) chuan ṭang­rual sorkar siam a tum loh thu a sawi. Leftist Peoples’ Democratic party (HDP) pawhin AKP chu thawh­pui a tum loh thu a sawi chiang nghal bawk.

AKP deputy leh parlia­mentary constitution com­mis­­sion hotu, Burhan Ku­zu chuan ṭangrual sor­­kar a din theih a rin loh thu sawiin, hei vang hian inthlan ṭhat thuai a ngai dawn niin a sawi. An ram inrel­bawl dan par­lia­mentary system aṭanga pre­si­dential system-a thlak tumtu, AKP chuan tun ṭum inthlana party mala sorkarna siam thei an awm lo chuan par­lia­mentary system chak tawk lohna a tilang a ni, a ti.