Pemlutte ṭanpui tum vangin Myanmar-ah nawrh huaihawt dawn
Myanmar, Rakhine state-a Buddhist-te chuan ramdanga pem tuma chhuak, Rohingya-te chu Bay of Bengal tuipuia ṭanpui tum an nih anih vangin lungawi lohna lantira narwh huaihawt an tum.
Rakhine hi Myanmar rama state rethei ber zinga mi a ni a, Rohingya muslim leh Buddhist-te an inkarah buaina a chhuak fo a, kum 2012-a nasa taka an intihbuai avang khan tun thlengin Rohingya mi tam tak chu camp-ah an la khawsa mek a ni.
Myanmar-a Rohingya-te hi sorkarin khua leh tui anga a pawm loh avang leh, enhran an nih vangin mi tam tak chu Malaysia leh Indonesia ramah pem tumin an chhuak fo a ni. Tun hnaiah Thailand-in mihring hmanga sumdawngte laka beihpui a thlak avangin pemchhuakte hruaitute chuan khawmual leh tuipuia lawngah an mi hruai eng emaw zat an tlanbo san.
Thla hmasa aṭang khan Rohingya leh Bangladesh aṭanga kal, mi 4,500 vel chu chhanchhuah an ni tawh a, hetihlai hian UN chuan tuipuiah mi 2,000 vel an la tangkhang mek tiin a sawi.
Myanmar thuneitute chuan tun hnaiah tuipuia tangkhang chhanchhuah, mi 900 vel chu Rakhine state-ah an dah a, an zinga a tam zawk chu Bangladesh aṭanga kal an nih thu leh, an ramah thawn kir leh an tum thu a sawi. Hetihlai hian Bangladesh mi ni lote erawh chu eng anga enkawl nge zel nge an nih dawn erawh a la sawilang lo.
Pem tumte chuanna lawng pahnih chhanchhuah a, Rakhine state-a hruai an nih avang hian Rakhine state-a Buddisht-te chuan sorkar laka lungawi lohna lantir an tum a, sorkar chu pem tumte ṭanpui hna titawp turin an duh. June 14 hian Bangladesh aṭanga kalte Rakhine state-a dah an nih duh lohna lantir an tum thu, social program coordinator Soe Naing chuan a sawi. "Heng mite thawn kir leh ngei turin kan phut a, Bangladesh sorkar chuan a la let leh tur a ni. Na taka Bangladesh sorkar nawr turin kan sorkar pawh kan phut a ni," a ti.