List of Shame-a Israel telh rawtna UN in a hnawl

Human rights group-in naupang dikna chanvo palzut ṭhin ram leh pawl, List of Shame-a Israel telh tura a rawtna chu United Nations-in a hnawl.

Thawhṭanni khan UN chuan List of Shame hi a tichhuak a, a tihchhuah hma hian rights group-te hian nikuma Israel sipai leh Palestinian hel, Hamas te Gaza-a indo lai khan naupang 500 chuangin an thihphah a ni tiin, he list-ah hian Israel hi telh an phut a ni. UN agency hrang hrangin hemi chungchang hi an sawiho hnuah, UN secretary-general in thutlukna a siam a ni.

UN secretary-general Ban Ki-moon chuan kum 2014-a Gaza Strip-a Israel sipaite beihpui thlaknaa naupang tam tak an thi chu a rapthlak hle tih a sawi a, mahse List of Shame-ah hian Israel chu a telh chuang lo.

Report chuan kum 2014-a Gaza Strip beih a nih ṭuma Palestinian school naupang thi zat hi nikum chhunga khawvela inbeihna thlenga naupang thi tamnaah pathumna a tling pha tih an sawi a, school tihchhiat zat pawh nikum chhunga tam ber a ni, a ti. Mahse report-ah hian naupang leh school beihnaa inhnamhnawih pawl hrang hrang hming tarlan zingah Israel erawh a lang tel lo.

Gaza Strip-a inbeihnaah hian naupang 561 (Palestinian 557, Israel pali) an thi a, midang 4,271 (Palestinian 4,249, Israel 22) in hliam an tuar tiin report chuan a tarlang.

UN secretary-general Ban chuan Israel leh Gaza-a naupangte dinhmun tiderthawnga vawi tam tak rocket kapchhuak ṭhin Palestinian helpawlte chu a dem thu a sawi.

UN-in List of Shame a siamah hian ram leh pawl 51 telh an ni a, an zingah hian Boko Haram leh Islamic State (IS) an tel a, Syria, Yemen, Democratic Repubic of Congo leh South Sudan ramte pawh telh an ni.