Firfiakte vangin Nigeria sipai hqrs sawn

Nigeria chuan Boko Haram helho hluar zel chu chak zawka an beih let theihna turin sipai headquarters chu hmar lama Maiduguri khuaah a sawn.

Sipai thuchhuah chuan Abuja aṭanga Maiduguri-a army headquarters sawn hi helho beih letna kawngah a ṭangkai dawn niin a sawi a, Thawhṭanni aṭang khan command leh control centre sawnna tur hian hma lak ṭan a ni.

Nigeria President thar, Muhammadu Buhari chuan Boko Haram helpawl chu an hneh ngei tur thu a lo sawi tawh a, May 29-a President atana lakluh a nih khan sipai headquarters chu helpawl hluarna, Borno state-a Maiduguri khuaah sawn a nih tur thu a lo puang tawh bawk.

Boko Haram hi kum 10 chuang liamtaah khan Maiduguri-ah hian din a ni a, Islamist helpawl an ni a, sorkar lakah helin Nigeria rama Islam ram din tumin an bei a, vawi tam tak pawikhawihna an thlen tawh a ni. Hmarchhak bialah ram eng emaw zat an la a, mahse tun hnaiah Nigeria sipaite'n an laka beihpui an thlak hnuin an ram lak tawh tam tak an chhuhsak tawh a ni. Helho laka beihpui thlaknaah Nigeria sipaite hi a ṭhenawm ram- Cameroon, Chad leh Niger sipaite'n an pui.