Bashar al-Assad-a'n Moscow-ah pawisa fai USD mtd 250 a thawn

Syria President aṭanga paihthlak tak, Bashar al-Assad khan kum 2018-2019 chhung khan pawisa fai, USD mtd 250 chu Moscow-ah thawnin a chheprelh nia sawi a ni. Heng pawisa fai hi US Dollar leh Euro in a thawn a ni.

Financial Times in a tarlan danin, Assad-a pawisa thawn hi Russian Bank hrang hrangah dah a ni a, ṭum khatah USD mtd 10 leh USD mtd 20 ten a thawn ṭhin niin a sawi.

Bashar al-Assad hi kum 2000-a a pa, Hafz Al Assad a thih hnuah Syria ramah hian ro rel ṭanin, kum 2011 aṭanga an rama tualchhung indona a thlen hnuah pawh thuneihna hi a chelh chhunzawm reng a ni. Tualchhung indona thlengah hian Russia leh Iran chu Bashar kaihruai sorkar thlawptu nghet tak niin, helpawl nena an inbeihnaah pawh kawng hrang hrangin an pui ṭhin. Hetianga an ramin buaina leh, sum leh pai lamah pawh harsatna nasa tak an tawh mek laiin, Assad hian a ṭhianṭha, Russia ramah hian sum tam tham tak a lo thawn a ni.

Tun thla tir lam khan Syria helpawl, Hayat Tahrir Al Sham (HTS) chuan an ram khawpui Damascus lain, Bashar kaihhruai sorkar an paihthla a, Bashar leh a chhungte pawh Russia-ah an tlanchhe zui bawk. Russia chuan Bashar hi humhimna, political asylum a lo pe a ni.