SKorea court-in Yoon paihthlakna ngaihtuah ṭan

South Korea MP-ten National Assembly-ah president Yoon Suk Yeol paihthlak rawtna an pawm hnuah, Constitutional Court chuan nimin aṭang khan a ngaihtuah ṭan ta.

Investigator-te chuan Yoon hi an rama martial law a puan chungchangah tun kar chhung hian thu zawhfiah a ni dawn tih an sawi. Nilaini hian police, defence ministry leh anti-corruption agency joint team chuan thu an zawt ang.

Court-a justice parukte chu impeachment ngaihtuahna tura meeting hmasa berah an tel kim vek a ni. Thla ruk chhungin Yoon hi President aṭanga paihthlak a ni dawn nge, President dinhmun chelh chhunzawm tir a ni dawn tih thutlukna an siam dawn a ni.

MP-ten President Yoon paihthlak rawtna an pawm hnuah, Yoon hi President a nihna aṭangin chawlh tir rih a ni a, prime minister Han Duck-soo chu acting president atan dah a ni. Han chuan nimin zing khan finance minister, Bank of Korea governor leh financial regulator hotute hmuin, an ram sum leh foreign exchange market dinhmunte an thlir ho. Acting President atana ruat a nih hnuah Han hian US president Joe Biden pawh Pathianni khan telephone-in a be nghal bawk a, ram pahnihten thawhdunna ṭha zawk siam zel an tum thu pawh a hrilh.