France rama cyclone Chido tlehin chhiatna nasa tak thlen

France rama Mayotte thliarkarah Pathianni khan thlipui, cylcone Chido tlehin chhiatna nasa tak a thlen. Chhiatna thlengah hian hriat theih chinah mi 14 an thi a, thi zat hi an la pun chhoh a rinawm.

Cyclone Chido hi kum za dawn chhunga Mayotte rama thlipui tleh na ber niin, Pathianni zan khan darkar khata km 200 chuanga naa tlehin Mayotte hi a nuai a ni. Chenna in, sorkar buiding leh hospital te a chhe nasa hle.

Mayotte hi dan loa pem lut tam tak chenna hmun niin, France interior ministry in a tarlan danin tunah hian document nei loa awm mi nuai khat chuang an awm mek a ni. A mi cheng tam ber hi Muslim an ni. France khawpui, Paris aṭanga km 8,000 vela hlaa awm niin, France ram chhung hmun dang aiin an rethei a, misual pawl pawikhawihna pawh a thleng fo ṭhin. A mi cheng hmun lia ṭhena hmun thum hi mi rethei, France poverty line hnuaia mi an ni.

Mayotte hi kum1843 khan France hian awpin, kum 1904-ah a chhehvela thliarkar dang nen a awp zui a ni. Kum 1974 khan Mayotte mipuite vote lakah Mayotte-a cheng zinga 63% chuan France rama beh chhunzawm an duh. A bula thliarkar dang Grande Comore, Anjouan leh Moheli te chuan kum 1975 khan France laka indepedence an puang a, mahse Mayotte chu France sorkar hnuaiah a awm chhunzawm ta zel a ni.