Donald Trump-a'n Hamas te a vau leh

US president-elect Donald Trump chuan Thawhṭanni khan Palestinian firfiak pawl, Hamas chu vau lehin, nakkum January 20-a US President atana lak luh a nih huna an mi hrente an chhuah lo a nih chuan a pawi hle dawn tih a sawi.

Donald Trump chuan Israel prime minister Benjamin Netanyahu nena an inbiak thu leh, Gaza-a indona thleng mek leh Syria ram chungchangte an sawidun thu a sawilang bawk.

Thawhṭannia Palm Beach, Florida-a press conference a neihah, Trump chuan Hamas te hnena hriattirna a lo pek tawh hi a sawinawn leh a ni. Office a luah luh huna inkahhai an puang hman lo nih chuan, "an tan thil nuam tak a ni dawn lo" a ti.

Israel PM Netanyahu pawhin Trump nena inbiakna ṭha tak an neih thu hi a sawi ve bawk a, Israel-in hnehna pumhlum a chan ngei a ṭul thute an sawi niin a tarlang. Israel chuan Hamas mi hren mekte hruai kir ngei tumin a bei zel dawn tih a sawi bawk.

Donald Trump lak luh a nih hma ngeia Hamas mi hrente chhuah an nih theihna atan Trump transition team leh US president kalchhuak tur, Joe Biden kaihhruai sorkar pawhin hma an la mek a ni. Trump-a Mideast palai, Steve Witkoff leh Massad Boulos te pawhin kar liam ta khan Middle East tlawhin, Saudi Arabia leh Qatar ram hruaitute an hmu. US national security adviser Jake Sullivan pawhin Israel, Egypt leh Qatar a tlawh bawk a, tun thla tawp lamah inkahhai hi puan theih a beisei thu a sawi.

Israel palaite pawh Hamas mi hren mekte chungchanga inbiakna nei turin Thawhṭanni khan Doha an thleng a, an zingah hian Israel Defence Force, Shin Bet leh Mossad aiawhte an tel.