Myanmar chungchang ngaihtuahin Thailand-ah meeting nei dawn

Thailand chuan tunkar chhungin Myanmar ram chungchang ngaihtuahin regional meeting pahnih a buatsaih dawn tih a sawi. Meeting pakhatah hian Myanmar sipai sorkar aiawh pawh a tel dawn a ni.

Thailand foreign minister Maris Sangiampongs chuan December 19 leh 20 hian meeting hi a kaihruai dawn a, Ningania meeting-ah zawk hian Myanmar aiawhte an tel ang. He hunah hian border security chungchang sawi a ni dawn a, Myanmar nena ramri inṭawm China, India, Bangladesh leh Laos aiawhte pawh an tel ang.

Zirtawpniah Association of Southeast Asian Nations (ASEAN) foreign minister-level meeting neih a ni ang a, ASEAN-in Myanmar rama boruak ralmuang a awm theihna atana ruahmanna,'Five Point Consensus' an lo siam tawhte sawiho a ni ang. He hunah hian Myanmar aiawh an tel dawn leh dawn loh a chiang lo.

Myanmar hi ASEAN member ni mah se, kum 2021-a sipai chakna hmanga civil sorkar paihthlak a nih hnuah khan ASEAN meeting-ah hian sipai sorkar aiawhte sawm loin, non-political aiawhte chauh an sawm tawh a ni. Kum 2025-a ASEAN chair hna chelhtu tur, Malaysia prime minister Anwar Ibrahim chuan ASEAN-in Myanmar-a inremna leh muanna a awm theihna tura ruahmanna a lo siam tawhte chu a taka kalpui ngei a tum thu a sawi.

Anwar chuan Thailand prime minister Paetongtarn Shinawatra nena Kuala Lumpur-a joint press conference an neihah, meeting neih turah hian Myanmar sipai aiawhte hi an tel ngei theihna turin kawng hrang hrangin inbiakna an neihpui thu a sawi a ni.