Canada Deputy PM Chrystia Freeland a bang

Canada deputy prime minister, finance minister ni bawk Chrystia Freeland chuan sorkar sum hman dan chungchangah prime minister Justin Trudeau nen hun eng emaw chen an inkar boruak a ṭhat loh hnuah, Thawhṭanni khan banna a thehlut.

Kar liam ta Zirtawpni khan Freeland leh PM Trudeau hian meeting an nei a, hemi ṭum hian PM chuan an thu inhmuh loh avangin post tenau zawk chelh turin a lo ti a ni.

Kum 56 mi, Freeland bang hi PM Trudeau tan thil pawi tak tur nia ngaih a ni a, inthlanpui awm lehah Conservatives hneh tura a beihnaah nghawng a neih rin a ni. Trudeau chuan finance minister atan hian a thawhpui hnai tak, public safety minister ni lai Dominic LeBlanc chu a ruat nghal a ni.

US president-elect Donald Trump-a'n office a luah hunah Canada aṭanga bungrua lak luha chhiah lak ṭhin chu 25% a tih san a tum thu a lo sawi tawh a, hemi atana hma lak dan turah Freeland leh Trudeau hi an ngaihdan a inmil thei lo a ni. Freeland hian banna lehkha a thehluhah pawh hei hi sawi langin, "US-in chhiah lak tih san a tum chungchang hi ngaihzam mai mai chi a ni lo" tiin hemi atan hian an sum hman dan thlenga an insiamrem a ngai tih a sawi.

Kum 2017-a Trump-a a President ṭum pawh khan Canada leh Mexico nena free trade treaty an neih chu tih tawp a lo tiam tawh a, mahse an inremna siam tawh kalpui zel a nih theihna kawnga hmalaknaah Freeland hi a thawh hlawk hle. Kum 2013-a politics a luhchilh hma khan Freeland hi journalist niin, media company hrang hrangah a lo thawk tawh a ni.

Thawhṭanni vek khan housing minister Sean Fraser chuan chhungkaw thil chhuanlama hmangin banna a lo thehlut tawh bawk a ni.