Bangladesh-in 2025 kum tawpah inthlanpui neih tum

Bangladesh hruaitu lailawk hna chelhtu, Muhammad Yunun chuan an ram inthlanpui chu nakkum kum tawp lamah emaw, kum 2026 kum tirah emaw neih a ni dawn tih a puang.

Zirlai pawl kaihhruaia Sheik Hasina kaihhruai Bangladesh sorkar laka lungawi lohna lantir a nih hnuah, kumin August thla khan sorkar hi paihthlak a ni a, hemi hnu hian caretaker sorkar dinin, hruaitu atan Nobel Peace Prize winner Muhammad Yunus hi dah a ni.

Kum 84 mi, Yunun chuan ram mipuite hnena thuchah a sawinaah inthlanpui neih hun tur hi a puang a, political party hrang hrangte nen inthlan neih ni tur tak hi an la ruat dawn tih a sawi. Hemi hma hian an ram dinhmun leh economy siamṭhat chu ngaih pawimawh hmasak a ṭul thu a sawi bawk.

Party hrang hrangin inthlan hun ruat fel thuai turin nawr mah se, Yunus chuan inthlan felfai tak buatsaih turin election commission chu hun pek deuh an ngai a ni tih a sawi. Kum 15 chuang zet chu voter list pawh enfiah a ni lo tiin, hengte hi tih fel a ngai dawn a, ṭhangthar tam takin a vawi khatna atan vote an thlak thei dawn a ni, a ti. An ram tana inthlan dik leh felfai, hriatreng tlak siam an tum thu a sawi a ni. Inthlan an neih hunah pawh voter dik tak ten vote an thlak vek theihna tura hma la turin election commission, political party leh social organisation-te a sawm.