Nazi-te vangin kum 77 hnuah doctorate degree la thei

German university chuan kum 1938-a Ph.D degree atana the­sis thehluh tawh, kum 102 mi Ingeborg Syllm-Rapoport chu Thawh­lehni khan a degree a hlan.

Pediatric expert Ra­po­port hi Nazi-te'n a degree lakna tura final exam neih an phalsak loh avangin Ph.D degree hi a hunah a dawng thei ta lo a ni. Rapoport-i nu, Maria Syllm hi Juda mi a ni a, hei vang hian Nazi-te hian a title lakna tura oral exam a hmachhawn tur chu an dang ta a ni.

Hamburg-a UKE Uni­versity Medical Cen­ter chuan Rapoport hian kum 1937-1938 khan a doctoral dissertation hi a buat­saih tih a sawi. Mahse Nazi-te vanga a zawh theih tak loh avangin a thesis a ziah zawh aṭanga kum 80 dawn hnu, May thla khan oral test hi a nei leh ta a ni, a ti.

UKE medical director leh chairman, Burkhard Goeke chuan a tawpa Rapoport thiltum an tih­hlawhtlin sak thei chu lawmawm a tih thu a sawi.

UKE University Medical Center chuan Rapoport-in kum 100 a tlin khan a chanchin hi dean-in a hrechhuak a, a buaipui zui ta niin a sawi.

Syllm-Rapoport-i hi kum 1938 khan United States-ah a pem a, pasal neiin pediatrics hna a thawk chhunzawm zel a ni. Mahse official-a Ph.D degree pek a nih tak loh avangin Philadelphia-ah kum hnih a zir nawn leh a ngaih phah a, kum 1950 khan a pasal leh a fate pali nen Germany-ah an kir leh a, East Berlin-ah an khawsa a ni.