Pakistan-in kum 23 hnuah mi a khaihlum

Pakistan sorkar chuan kum 23 liam ta, kum 1992-a kum 15 mi chauh a nih laia thi tura thiam loh a chantir, Aftab Bahadur chu nimin zing khan Lahore jail-ah a khaihlum.

Aftab Bahadur hi Kristian a ni a, kum 15 mi a nih lai hian mi pahnih thata puhna thubuaiah thiam loh chantir a ni. Hetihlai hian human rights group-te chuan Bahadur hi thiam loh chantir a nih theihna atan hian thuhretute chu nghaisak an ni tih an sawi a, tihhlum a ni chu thil zahthlak tak a ni, an ti.

Kum 1992-a thiam loh chantir a nih lai hian kum 15 mi lakah thi tura hremna hi pek theih a ni a, mahse kum 2000 khan Pakistan chuan he dan hi siam ṭhain, kum 18 chinah a tisang a ni.

International human rights group, Reprieve director Maya Foa chuan, "Pakistan judicial system tana ni zahtlak tak a ni. A tawp thlengin Pakistan chuan Aftab Bahadur-a ukil te'n an puhna laka a fihlimzia lantir tura finfiahna an neihte tilang turin hun a pe duh lo a, he thil hi rorelna dik palzutna a ni a, Aftab-a hretute tana ni lungngaihthlak a ni," a ti.

Reprieve chuan Bahadur hi thuhretu mi pahnihte thusawi aṭanga thiam loh chantir a ni tih sawiin, heng thuhretu pahnihte hian an thusawi hi an hnuah an sut leh a, mahse nasa taka nghaisak an nih avangin Bahadur thiam loh chantir zawngin thu sawi an nih thu an tarlang.