MERS vangin SKorea President-in zin tur ṭhulh

South Korea President Park Geun-hye chuan US tlawh a tum chu an rama Middle East Respiratory Syndrome (MERS) hri leng mek vangin a ṭhulh.

Presidential press secretary Kim Sung-woo chuan President Park hian karleha US tlawh a tum chu a ṭhulh rih tih sawiin, an rama hri leng mek khuahkhirh tura chak taka hma lak a tum thu a sawi.

Park hian ni nga chama US tlawha zin a tum a, June 16 hian US President Barack Obama nen meeting neih an tum a ni. US pawh SKorea President zin tum ṭhulh a nih thu hi hriattir a ni tawh a, ram pahnihte chuan remchang hmasa berah a zinna tur ruahman ṭhat an remti.

SKorea-ah hian MERS hri vei mi 13 hmuh belh leh a ni a, he hri vei hmuhchhuah tawh hi mi 108 an tling tawh a ni. MERS vei zinga mi pahnih an thih belh leh avangin he hrileng vanga thi hi pakua an tling tawh bawk.