Turkey Prime Minister a bang

Turkey Prime Minister Ahmet Davutoglu chu parliament inthlan­pui neih takah a party, Justice and Development (AK) Party in majority a lak phak loh avangin a bang.

President Recep Tayyip Erdo­gan chuan PM banna hi a pawmsak tawh a, mahse sorkar thar din a nih hma chuan a hna hi chelh chhunzawm rih turin a ngen.

Parliament inthlanah party mala sorkarna siam turin AK Party hian member a ngah tawk lo a, hei vang hian ṭangrual sorkar siampui tur a zawn a ngai dawn a ni. President Erdogan chuan PM hi ṭangrual sorkar siam dan tur ngaihtuah tura a hriattir thuai beisei a ni bawk.

Thawhlehni khan President leh Prime Minister-te hi an ram khawpui, Ankara-ah an inhmu a, kum 13 hnua AK party-in majority a neih phak tak loh avanga an kal zel dan turte an sawidun a ni.

Inthlanpui result hi official-a puan a la ni lo a, official-a puan a nih hunah result puan aṭanga ni 45 chhung ngeiin AK party hian sorkar thar a siam a ngai dawn a ni. Hemi chhunga ṭangrual sorkar siampui tur a nei lo a nih chuan, inthlan ṭhat a ngai ang.

Pathiannia Parliament inthlan neih takah AK party hian par­liament seat 550 aṭangin seat 258 a la a, sorkarna siam turin member 18 a mamawh belh a ni.

Seat 80 la tu, pro-Kurdish People's Democratic Party chuan AK party hi thawhpui an tum loh thu an sawi tawh.