Russia chemical weapon hotu Igor Kirillov that

Russia chemical weapons division hotu, Igor Kirillov chu an ram huna Thawhehni zing khan Moscow-ah thah a ni a, Ukraine Security Service (SBU) chuan he thil hi an tih niin an chhal.

Kirillov leh a assistant, Ilya Polikarpov hi Moscow chhim chhak lama aparment building bulah, a chuanna electric scooter-ah bomb dah ruk puak vangin a thi niin Russia leh Ukraine official-te chuan an sawi.

Kum 54 mi, lieutenant general Igor Kirillov hian kum 2017 aṭang khan Russia nulcear, biological, and chemical protection troops hotu lu ber hna hi chelhin, Russia-Ukraine indona a thlen hnua Russia ram chhungah Russia sipai officer thah zinga ranking sang ber a ni. He pawikhawihna thleng vang hian Russia pawhin military official-te himna chungchang a ennawn nghal rin a ni.

Russia thuneitute chuan Kirillov leh a assistant thahnaa inhnamhnawiha rinhellh an man nghal tih an sawi. Investigative Committee chuan nimin khan hemi chungchangah hian thuchhuah siamin, an mi man chu Uzbekistan ram mi a nih thu leh, kum 29 mi a nih thu an sawi a, Ukraine sipaiah lak a ni tih an sawi bawk "Ukraine special service-in sipai atan lain, a zin chhuahna atan hian USD nuai 1 pek an tiam bawk a ni," tiin an sawi. Kirillova te chuanna electrict scooter-a bomb kam hi remote control hmanga tih puah nia sawi a ni bawk.

Kum 2022, Ferbuary thlaa Russia-in Ukraine a run hnuah, ram pahnihte hi an la indo chhunzawm reng a ni. Russia chuan an ram leilung chhungah ngei Russia mi eng emaw zat that tawhah Ukraine hi a puh. Heng zingah hian kum 2022 August thlaa Russian ultranationalist Alexander Dugin-a fanu, Darya Dugina chuannaa car-a bomb puak pawh a tel.

Ukraine chuan an ram beihnaah danin hman a phal loh, chemical ralthuam chu Russia sipaiten an hmang niin an lo puh tawh a, he ralthuam hmanna kawnga a mawhphurtuah Kirillov hi an puh bawk. Mahse an puhna hi Russia chuan a pha thung. October thla khan Britain chuan indonaa chemical, chlorpicirin hman tira puhin Kirillov hrekna hi an lo siam tawh bawk a ni.

Russia ramah chuan Kirillov hi ram hmangaihtu dik tak, thu dik tana beitu leh khawthlang ramte thil tih dik lo pho langtua ngaih niin an ngai thung.