Hermon tlangah Israel sipai dah chhunzawm dawn

Israel prime minsiter Benjamin Netanyahu chuan ruahmanna dang an siam hma chuan Syria ramri lama Hermon tlangah Israel sipaite dah chhunzawm rih an nih tur thu a sawi.

Prime Minister Netanyahu hian Thawhlehni khan Hermon tlang hi tlawhin, a lung pawh a ti leng hle tih a sawi. "Kum 52 liam taah khan he hmunah hian Sayeret Matkal patrol-in sipai niin kan lo kal tawh a ni," tiin a hmunhma pawh a lo la danglam lo hle tih a sawi. He hmun hi Israel himna tur atana hmun pawimawh tak a ni tiin, tun hnaia Syria ram tualchhung buaina thleng nen, Israel himna tura ruahmanna ṭha ber an siam a ngaih thu a sawi a ni.

Netanyahu chuan, "Hermon tlang chhip hi Israel-in a bul hnai vel hlauhawm awm thei tur a hmuh theihna tur hmun pawimawh a ni. Heta ṭang hian ding lamah Lebanon-a Hezbollah te hmun leh, vei lamah Damascus te a hmuh theih a ni," a ti.

Hermon tlang hi Golan Heights-a awm a ni a, he hmun hi kum 1967 Middle East war-ah khan Israel chuan Syria aṭangin a la a, kum 1981 aṭangin a ram zauhna atan a hmang zui bawk. Mahse hei hi ram dangte chuan an pawmpui lo a ni. Hermon tlang hian Syria, Lebanon leh Israel luah Golan Heights ah inzarpharhin, atlang chhip sang lai ber hi mter 2,814 niin Syria ram chhunga awm a ni. Hetih lai hian a tlang chhim lam leh hniam lam chu Israel ram luah chhungah a awm thung.