Russia-in Ukraine beihna atan NKorea missile a hmang; Indonaah NKorea sipai 100 an thi tawh nia sawi a ni
United Nations Security Council (UNSC)-ah Russia-in Ukraine beihna atan North Korea missile a hmang tih hrilh a ni. Russia pui tura North Korea sipai tirh zinga 100 vel chu indona hmunah an thi tawh nia sawi a ni bawk.
United Kingdom-a hmunpui nei, Conflict Armament Research hotu, Jonah Leff chuan Nilaini khan UNSC hnenah hian kumin July leh August thla khan Ukraine kahna atana hman, missile pali themte chu North Korea siam a ni tih hriat a nih thu a hrilh. North Korea hian ballistic missile siamin, Russia hnenah hian a supply a ni. Russia hman pawh hi kumina a supply ngei nia a lan thu Leff chuan a sawi.
June thla khan Leff hian UNSC-ah an pawlin kumin kumtir lama Ukraine beihna atana hman, missile them an zirchiannaah North Korea siam a ni tih an hmuhchhuah thu a lo hrilh tawh bawk a ni.
Russia leh North Korea hian tun hnaiah defence lama thawhdunna tur inremna pawh an siam a, Ukraine nena an indo meknaah Russia pui turin NKorea chuan sipai 10,000 chuang a lo thawn tawh bawk niin US leh SKorea official-te chuan an sawi. Mahse hei hi Russia leh NKorea lam chuan an sawichiang duh lo thung.
South Korea MP Lee Sung-kwon chuan Russia pui tura kal, North Korea sipai 100 vel chu indona hmunah an thi tawh a, hliam 1,000 vel an awm tawh bawk niin nimin khan a tarlang. Lee chuan NKorea sipai thi zingah hian high-ranking official te pawh an tel tih a sawi.
US Pentagon thupuangtu pawhin Russia-Ukraine indonaah NKorea sipaite an thi tel tih a lo sawi tawh a, mahse a zat erawh a sawilang lo thung. Russia pui tura NKorea sipai tirhte hi indona hmuna la tel ngai lo, tawnhriat nei lo an ni a, indona hmuna thawn an nih hmain Russia-ah training an nei hmasa phawt a ni. NKorea sipai thite hi Russia-a Kursk biala inbeihna hmuna thi nia hriat an ni. Lee chuan NKorea hian sipai tirh leh a tum niin a sawi bawk.