US-in Iraq-ah sipai a thawn belh dawn

United States chuan Islamic State (IS) firfiakte nen inbei mek, Iraq sipaite training pe turin sipai 450 a thawn belh leh.

US President Barack Obama chuan Iraq-a sipai thawn belhna turin thu a pe a, US sipaite hian Anbar province-a Taqaddum military base-ah Iraq Security Force-te hi training leh thurawn an pe dawn a ni.

White House thuchhuah chuan US sipaite hi khawmuala IS firfiakte beihnaah an tel ve dawn lo tih a sawi. Sipai 450 thawnluh belh tur bakah Iraq-ah hian US sipai 3,100 an awm sa tih a tarlang bawk.

US sipaite hian Iraq sipaite bakah local tribal fighter-te chu thurawn te an pe ang a, Anbar province-a IS firfiakte laka beihpui an thlakna tura ruahmanna siam dan turahte an pui dawn a ni.

Iraq-a US sipai lo awmsate hi Anbar province-a al-Asad air base aṭangin an thawk a, mahse tuna sipai dah belhte hi chu firfiakte kuta awm mek, Ramadi khawpui hnaihah dah a ni ang. Hei hian US kaihhruai ṭangrual pawlte'n thlawhtheihna hmanga firfiakte laka beihpui an thlakna kawngah pawh a pui thei dawn niin official-te chuan an sawi.

IS firfiakte hian Iraq leh Syria ramah hmun tam tak lain an thununna hnuaiah an dah mek a, hetihlai hian Australia Prime Minister Tony Abbott chuan IS hian middle east chauh ni lo, khawvel puma inzarpharh an tum, tiin Asia Pacific ramte chu firfiak pawlte do let tura ṭan la turin a ngen. Abbott chuan an ram mi leh sa 100 chuang zetin Syria leh Iraq-a IS-te hi an zawm tawh niin a sawi bawk.