Pakistan-in Rohingya Muslim-te ngaihven turin a ngen

Pakistan National Assembly (PNA) chuan Myanmar rama Rohingya Muslim-te'n enhran leh tihduhdah an tawrh chungchang ngaihven tura United Nations (UN) leh Organisation of Islamic Cooperation (OIC) bakah international community-te ngenin, resolution a pass.

Assembly-ah Rohingya Muslim-te chungchanga resolution hi Minister for Defence Production Rana Tanvir Hussain-a'n a pulut a, "Rohingya Muslim-te'n harsatna leh vauna hrang hrang an tawh ṭhinte hi titawp turin House chuan a duh a ni," a ti. Resolution pass lai hian Prime Minister Muhammad Nawaz Sharif pawh a awm.

National Assembly hian an resolution-ah hian Rohingya Muslim-te chunga pawikhawihna thleng ṭhin an dem thu an sawi a, Myanmar sorkarin Rohingya-te chunga pawikhawihtute a thlawp chu thil pawi tak a nih thu a tarlang bawk.

State leh human rights activist hrang hrangte pawh international law zawm a, Rohingya Muslim-te himna leh thlamuang taka an awm theihna tura a ṭul anga hna thawk turin resolution chuan a ngen bawk.