Putin-a'n Pope Francis a hmu
Italy tlawha zin, Russia President Vladimir Putin chuan nimin khan Vatican City-ah Roman Catholic kohhran hotu, Pope Francis a hmu. Putin leh Pope-te hi minute 50 vel an inkawm a, Ukraine rama remna leh muanna a awm theihna tura inremna siam ṭha an tih thute an sawi. Middle East-a Islamic State (IS) firfiak pawl vanga buaina thleng mek chungchangte an sawidun bawk.
Ukraine ram khawchhak lam, Crimea bial chu nikum khan Ukraine aṭanga inlahrangin Russia ramah a bet a, khawthlang ramte chuan Russia chu a sipaite hmanga Ukraine helpawlte thlawpah an puh. Hei vang hian Russia hrekna pawh an siam phah a ni. Mahse an puhna hi Russia chuan a pha thung.
Vatican chuan Pope Francis hian Ukraine tualchhung buaina chinfel a ngaih thu Putin hi a hrilh a, buai chhuahna biala chengte tana chhawmdawlna pek luh te, boruak siamṭha tura theihtawpa hma lak a ngaih thute a sawipui a ni, a ti.
Mikhail Gorbachev-a hun laiin Holy See leh Kremlin hian inzawmna ṭha tak an siam avangin, Russia hruaitu, Italy ram tlawhte hian an cham chhungin Pope tlawh tel hi tihdan phungah an neih a ni.
Tunkar tira Germany rama G7 summit neih chuan Russia hi Ukraine tualchhung buainaah a inhnamhnawih zui zel a nih chuan hrekna dang pekbelhah an vau.
Putin hian Pope a hmuh hmain Milan-ah Italy Prime Minister Matteo Renzi a kawm bawk a ni. Renzi chuan Russia chu firfiaka chetna do letna kawnga thawh hlawk leh ṭangkai tak a nih thu a sawi a, Mediterranean-a pem tumte vanga buaina thleng mek chinfel pui turin Putin chu a ngen bawk. Italy PM hian Ukraine buaina tawh chungchangah Russia a demna thu engmah a sawilang lo.