Trump lak luh hmaa kir turin international student-te chah

US-a college leh university hrang hrangte chuan an institution-a ram dang mi zirlai, international student-te chu US President atana Donald Trump lak luh a nih hmaa campus lama kir turin an chah.

President-elect Trump hian US-a zin luh khapna a siam dawn leh dawn loh sawichian ni lo mah se, university lama thuneitute chuan venthawn thilah ram dang zirlaite hian harsatna an tawh lohna turin thurawn hi an pe a ni. Kum 2017-a US President atana lak luh a nih khan Trump hian Muslim ram pasarih - Iraq, Syria, Iran, Sudan, Libya, Somalia leh Yemen aṭanga US-a zin khapna thupek a ti chhuak nghal a, hei hian zirlai leh zirtirtute pawh a huam tel vek a ni. A president term khatna chhungah travel ban a siam hian ram 15 nghawngin, mi 40,000 chuang zet visa dilna pawh hnawlsak a ni bawk. Mahse kum 2021-a Joe Biden a president hnuah a thupek hi a rawn sut leh a ni.

Kum 2023-24 chhunga US college leh university-a kal, ram dang zirlai hi mtd 1.1 chuang an awm. US-a international student awm mek zingah a zahve aia tam hi China leh India aṭanga kal an ni. India chuan China leh pelin, 2023/2024 academic year-a US-a ram dang zirlai awm tam ber niin mi 331,602 an tling a, kum hmasa aia an tamna hi 23% a tling. Zirna in ṭhenkhat chuan Trump lak luh a nih hma hian spring semester an ṭan hman dawn avangin international student-te chu an kir hman a ngai tho a ni.