Putin-a'n Ukraine chungchangah Trump inbiakna neihpui a inpeih

Russia president Vladimir Putin chuan Ukraine nena an indo meknaah, inremna siam a nih theihna kawng ngaihtuaha US President-elect Donald Trump nena inbiak chu eng hunah pawh a inpeih reng tih a sawi.

Press conference a neihah, Russia Prsident chuan Ukraine nen an indonaah an sipaite chu chungnung zawk mah se, Ukraine khawtlang lama Kursk bial pumpui chu engtikah nge Ukraine sipaite kut aṭanga an lak pumhlum theih dawn tih a sawi theih loh thu chu a sawi lang ve bawk.

Trump-a'n Russia-Ukraine indona tih tawp tawh a ṭul thu a sawi chungchangah, Putin chuan US President thar tur nen hian inremna siam a nih theih dan ngaihtuaha inbiakna neihpui chu a inpeih reng tih a sawi. "Engtik hunah nge ka hmuh dawn ka hre lo a, amah pawhin engmah a la sawi lo. Kum li chuang ka be tawh lo a, mahse inbiakna nei tur chuan eng hunah pawh ka inpeih reng e," a ti. Trump nen an inbiak hunah chuan sawi tur pawh tam tak an nei ngei dawn tih sawiin, Russia chuan inbiakna leh inremna chu a inpeih reng tih a sawi.

US President Joe Biden-a'n tun hnaia US siam missile-te Russia ram chhung kahna atana hman phalna a pek chungchang Trump-a'n a sawisel chu lawmawm an tih thu Russia chuan a lo sawi tawh bawk.