Damascus khaw bulah mi nuai 1 chuang phumna thlan hmu chhuak

Syria khawpui, Damascus aṭanga km 30 vela hla, al-Qutayfa khaw daiah thlan lian tak, mi nuai khat chuang phumna nia hriat hmuh chhuah a ni.

Kum tam tak chhung chu he hmun hi Syria president aṭanga paihthlak tak, Bashar al-Assad kaihhruai sorkar khan an mi thahte ruang paihna atan an hmang a ni. Satellite image leh mita hmutute aṭangin, he thlanmual hi Syria civil war ṭantirh lam khan Assad-a sipaite siam ngei a ni tih hriat a ni a, truck hmangin he hmunah hian ruang hi an paih ṭhin a ni.

Syria tualchhung indona thlen lai khan Assad kaihhruai sorkar chuan sorkar dodaltute chu nghaisain an ti hlum nasa hle nia sawi a ni. Official-te chuan he thlan hmuhchhuahah hian mi nuai 1 chuang ruang paih nia an rin thu an sawi. Satellite image an zirchian naah, human rights organisation chuan kum 2012-2014 inkarah khan Assad-a sipaite chuan he thlan hi an lai a, kum 2022 thleng pawh khan an hmang chhunzawm tih hriat a ni bawk. Ruang an paihna thlan hi football field pahnih tiat vel a ni a, kum tam tak hman ni tawh mah se Assad sorkar lai khan a chhehvela chengte chuan an sawichhuak ngam lo a ni.

Al-Qutayfa mayor hlui, Haj Ali Saleh chuan sorkarin ruang a thawnte phum tura thupek an dawn ṭhin thu a sawi a, "An rawn phurh apiang chu lo phum mai tura tih kan ni," a ti. Mahse kum 2012 khan ruang tam tak phumna tur thlan siam tura thupek a dawn chu zawm duh loin a bang a, hun rei vak lo hren zui a nih phah bawk.