China security hotu hlui damchhung tang tura hrem a ni

China security hotu hlui, Zhou Yongkang chu a thuneihna dik lo taka hmang leh, thamna sum laa, sorkar thuruk puangzara puhnaah thiam loh chantir a nih hnuin, Ningani khan damchhung lung-in tang tura hrem a ni.

Kum 73 mi, Zhou hi Tianjin Municipal No. 1 Intermediate People's Court chuan May 22 aṭang khan a thubuai hi a ngaihtuahsak tawh a ni. Thiam loh chantir a nih hnu hian a thil neihte pawh sorkarin an laksak vek tawh a ni. Zhou chuan court-in thiam loh a chantirna hi a pawm thu sawiin, khin let a tum lo tih a sawi.

Zhou hi China rama rorellai, Communist Party of China (CPC) Central Committee-a Political Bureau-a Standing Committee member a ni tawh a, CPC Central Committee-a Commission for Political and Legal Affairs secretary hna pawh a lo chelh tawh a ni.

Court chuan thamna sum, yuan maktaduai 130 dawnga puhnaah Zhou hi thiam loh a chantir. Zhou hian a thuneihna hmangin mi panga-te hnen aṭangin pawisa leh ram, yuan 731,000 a la nia puh a ni. Heng thamnate hi a nupui leh a fate'n an dawn a ni. Sorkarin yuan tluklehdingawn 1.49 a hloh phahna tura dik lo taka sumdawngte puia puh a nih bakah, sorkar thuruk pawimawh tak panga chu mi pakhat hnenah a hrilh nia puh a bawk.

Court chuan Zhou hian thamna sum tam tham tak laa puh ni mah se, a tam zawk hi a hriatpui loha a chhungte'n an lak a ni a, a thiam lo tih pawh a inpawm thlap a ni, a ti. Zhou hian a chhungte hnenah dik lo taka sum an lakte chu pe kir turin a lo ngen tawh a ni, thamna thilpek leh sum an dawnte pawh hmuh let vek an ni bawk. Hei bakah hian ram thuruk a puanzarte chuan nghawng pawi tham a nei lo niin a tarlang bawk.

Ningani khan China chuan Internet-a an ram sipaite chung­changah thu dik tawk lo vawrh darhah punin mi pakua an man. Military newspaper chuan mi pakua an mante hian an ram sipai, People's Liberation Army-a officer eng emaw zat chu nawrh huaihawtnaa an tel nia sawiin, an sipaite hming an tihchhiat phah niin a tarlang. Hei vang hian thu dik tawk lo thehdarhah puhin mi pakuate hi man an ni a, an hming erawh puanzar a ni lo.

Thla hmasa khan sipai hming tichhe zawnga thu vawrhdarhah puh mi 10 chu man an lo ni tawh bawk a, an mi mante hi ni 15 chhung lung-in tantir an ni.