IS beihna atan US-in dollar tld 2.7 a seng tawh
US kaihhruai ṭangrual pawl chuan Iraq leh Syria-a Islamic State (IS) firfiakte laka beihpui thlakna atan dollar tluklehdingawn 2.7 a seng tawh. Chawh rualin ni khatah dollar matkaduai 9 vel seng ang a ni.
Ṭangrual pawlte hian nikum August thla aṭang khan firfiakte lakah hian beihpui an thlak a, an hmun pawimawhte chu ṭum 4,100 chuang an bomb tawh bawk.
IS firfiakte beihna tura US-in sum a sen zat hi Pentagon-in a tihchhuah a ni a, an sum sen aṭanga hmun thuma ṭhena hmun hnih chu Air Force tana hman a nih thu a tarlang bawk. Air Force tan dollar tluklehdingawn 1.8 hman a ni a, Navy tan dollar matkaduai 438 niin army atan dollar maktaduai 274 sen a ni.
US House of Representative chuan defence atan hian dollar tluklehdingawn 579 dah a lo remti tawh a, IS beihna atana sum dah belh tawh lo tura rawtna siam pawh a hnawlsak a ni.
Iraq-a IS laka beihpui thlakna kal zelah, US chuan Anbar-ah US military hub siam thar leh a tum nia sawi a ni a, hemi chungchang hi ngaihtuah tura an dah thu Joint Chiefs of Staff chairman, General Martin Dempsey chuan a sawi. Military hub siamthar tum hi thla hmasaa firfiakte'n an lak, Anbar province khawpui Ramadi aṭanga kilometre 25 vela hla, Taqaddum military base-ah dah tum a ni.