Germany-a Krismas bazar beihnaa thi 5 sunna hun hmang

Germany-a Magdeburg khua Krismas bazar-ah kar liam ta Zirtawpni zan khan mi pakhatin a motor khalh lutin mi a pawng chil a, mi panga an thi. Thi zingah hian naupang kum kua mi a tel. Hliam tuar mi 200 chuang an awm bawk. Thi te sunna hun hi Inrinni khan Magdeburg Cathedral-ah hman a ni a, Chancellor Olfa Sholz, president Frank-Walter Steinmeier leh Saxony-Anhalt state premier Reiner Haseloff ten an hmanpui.

Thuneitute chuan motora mi pawng chiltu hi doctor kum 50 mi, Saudi Arabia aṭanga pem lut, Islam-critical activist inti niin, police kutah a npe nghal a ni. Prosecutor Horst Walter Nopens chuan pawikhawihtu mi panga thattua puhna leh, mi 205 thah tuma puhnaa chhui chian nghal a nih hu a sawi. A pawikhawihna chhan tak hi hriat a la ni lo bawk. Police-te chuan pawikhawihtu hming hi puangzar lo mah se, German news outlet hrang hrang chuan Taleb al-Abdulmohsen niin an sawi a, psychiatry leh psychotherapy specialist a ni. Kum 2006-ah Germany-ah lutin 2016-ah refugee ah pawm a ni a, Bernburg-a specialist rehabilitation clinic-ah a thawk a, mahse October thla aṭang khan chawlh a lak leh dam lohna vangin a hna thawhna hmunah hian a kal tawh lo a ni. Gulf ram aanga Muslim tlanchhiate puihna turin website a siam bak.

Pawikhawihna thlenna, Magdeburg khua hi Germany khawpui, Berlin khawthlang lam, km 130-a hlaa awm niin, mi nuai 2.4 vel an cheng a ni. He pawikhawihna thleng vang Germany-a khawpui hrang hranga Krismas bazar siamah venhimnate tih khauh nghal a ni.