Gaza-ah inkahhai puanna tur 90% ti fel tawh

Gaza Strip-a indona thleng meka Israel leh Hamas ten inkahhai puanna tura inbiakna an neih mekah 90% an ti fel tawh niin Palestinian official-te chuan an sawi.

Inbiakna neihah Gaza Strip-a Israel sipaite la awm chhunzawm dan turte, Hamas mi hren mekte chhuah an nih dan chungchangte sawi tel a ni. An thu ngaihtuah tam zawkah an inrem tawh a, hetih lai hian Gaza chhim lam, Egypt ramri bul hi Phildephi corridor-a Israel sipaite dah chungchangah an la inrem thei lo.

Palestinian official-te chuan Doha-a inbiakna an neihah, Israel leh Gaza inrinaa buffer zone siam chungchang pawh an sawi niin an tarlang. He hmunah hian Israel sipaite awm chhunzawm tir tura tih a ni bawk. Hemi chungchang hi an sawifel theih chuan, ni reilo te hnuah inkahhai hi puan theih an beisei tih an sawi.

Gaza-a inremna siamna turah a thawh khatnaah hian Hamas-in Israel sipai hmeichha an man, pakhat an chhuahah Israel-in Palestinian mi an man 20 zel an chhuah ve thung dawn a ni. Tang chhuah turte hming hi sawi a la ni lo a, mahse Israel sorkarin kum 25 leh a aia tam tang tura a hrem mek, mi 400 aṭangin an thlang dawn a ni. Fatah senior leader, Marwan Barghouti erawh an telh a rinawm lo thung.

Hamas in an hren mek, Israel mite chu a tahtawla chhuah a ni bawk ang. An mi hren zinga ṭhenkhat, chin hriat loa awmte chu Hamas lam hian an awmna hmun an zawn chhuah ve leh phawt a ngai dawn a ni. Gaza-ah hren mek mi 92 zingah hian Israel chuan nungdama la awm hi mi 62 vel niin a sawi.

Inkahhai puan a nih chuan Palestinian mite pawh Gaza hmarlamah an kir phalsak an ni dawn a, civil mite chhawmdawlna hi nitin truck 500 vela phurh luh tura tih a ni.

October 7, 2023-a Hamas ten Israel chhim lam an beih ṭum khan mi 1,200 vel an thah bakah, mi 250 vel an man a,an mi mante hi Gaza-ah an hreng zui a ni. November 2023 khan inremna siamin tang an lo inthleng tawh a, hemi ṭum hi mi 100 chuang chhuah an ni. Hetih lai hian Israel an lo chhuah loh zinga hmun thum ṭhena hmun khat chu an thi tawh niin a sawi.