Israel-in Hamas hruaitu an that tih sawichiang ta

Israel chuan kumin July thlaa Iran-a Hamas hruaitu, Ismail Haniyeh thattu an ni tih a vawi khatna atan an sawi chiang ta.

Israel defence minister Israel Katz chuan Tehran-a Haniyeh thahnaah an inrawlh thu hi Yemen helpawl, Houthi a vaunaah a sawi chhuak a ni. "Israel chuan an infrastructure tichhian, an hruaitute pawh a tihlum dawn a ni. Tehran, Gaza leh Lebanon-a Haniyeh, Sinwar leh Nasrallah te chunga kan tih ang khan. Hodeidah leh Sana'a ah pawh khatiang khan kan che leh ang," tiin a vau a ni.

Haniyeh hi Israel thah niin Iran thuneitute chuan an puh nghal a, mahse Israel chuan an puhna chungchang hi a chhang let lo a, tun hi mipui hriata an sawi chhuahna hmasa ber a ni. Iran khawpuia Haniyeh thah a nih hnu hian Israel sipaite chuan Gaza-ah Haniyeh thlaktu, Yahya Sinwar chu an that zui leh bawk. Haniyeh hian October 7, 2023-a Hamas ten Israel an beih avanga Gaza Strip-a indona a chhuah hnu khan Qatar aṭangin Hamas hi hoin, ram dang aiawhte nena inbiakna neihah pawh a tel a ni. A thlaktu, Sinwar hi Israel beih a nihna tura ruahmantu ber nia sawi a ni bawk.

Iran thlawp, Houthi helpawl hian Hamas an thlawpna lantirin Israel in an bei zui ve reng a, Inrinni liam ta pawh khan Tel Aviv chu missile-a kapin, mi 16 in hliam an tuar a ni.