SKorea eptuten acting President Han paihthlak leh tum

South Korea eptu party lian ber, Democratic Party of Korea chuan an ram prime minister leh acting president Han Duck-soo paihthlak rawtna motion thehluh an tum leh tih an sawi.

DP hruaitu, Park Chan-dae chuan hemi chungchang hi TV-a thu a sawinaah sawi chhuakin, acting President Han hian an party-in an nawr mek special councel bills ngaihtuah hun chu a tikhawtlai niin a sawi. He bill hi martial law a puan avanga paihthlak an tum mek, president Yoon Suk Yeol bakah a nupui, first lady Kim Keon Hee te thil dik tawk lo tia an puhna hrang hrang chhui chiang tura special counsel din an phutna a ni.

December 14, 2024-a president Yoon laka impeachment motion put luh pawm a nih avangin Han hi acting president atan ruat lailawk a ni. Yoon-a'n martial law hman a tumnaah Han hian a thurualpui niin DP chuan an puh bawk. Special counsel din tura an phutna a ti khawtlai zel chuan ram danpui zawm a tum lo a, thil dik lo titu lam a ṭang zawk a ni, tiin Park chuan a sawi.