SKorea ram 'super-aged' society a ni ta

South Korea ram chu 'super-aged' society a ni ta a, official data-a a landanin an ram mipui hmun ngaa ṭhena hmun khat chu kum 65 leh a chunglam an ni.

Ministry of interior and safety-in official data a tih chhuah tharah, South Korea-a kum 65 leh a chung lam awm zat hi mtd 10.24 niin, hei hi an ram mipui zawng zawng, mtd 51 aṭangin 20% a tling.

United Nations chuan ram mipui awm zat aṭanga 7% aia tam kum 65 leh a chunglam an tlin chuan 'aging society' tiin a sawi a, 14% chunglam chu 'aged society' tih a ni a,kum 65 leh a chunglam 20% an tlin chuan 'super-aged' society tiin a sawi a ni.

South Korea ramah hian nau piang zat hi kumtinin a tlahniam zel a, kum 2023 khan nau piang rate hi 0.72 niin khawvela a hniamna ber ram a ni. Ram mipuiin ral lam an pan zel lohna turin kum khata nau piang zat hi 2.1 a nih a ngai a ni.

Ministry data tih chhuah thar bera a lan danin, SKorea-a hmeichhia awm zing 22% hi kum 65 leh a chunglam niin, mipa hi 18% an ni bawk.

SKorea leh East Asia ram dangah nau piang zat hi an tlahniam zel, anni bakah Europe ram tam zawkah pawh nau piang an tlem sawt hle a, kum upa lam an pung zel thung. Mahse Europe ramah hian ram dang aṭanga pem lut an tam avangin hnathawk rual, working age awm zat erawh a la ziaawm phah. Mahse South Korea, Japan leh China-ah erawh ram dang aṭanga pem lut an tam loh avangin hnathawk thei rual zat hi a tlahniam tawh hle a ni.

Mithiamte chuan Asia-a ram hrang hranga nau piang an tlem zel chhan pakhat hi work culture nghawng te, khawsakna hautak lutuk vang te, inneih leh gender equality chungchanga ngaihdan dang a awm vang te, ṭhalai zingah fa neih kher duh lem lo an pun tak vangte niin an sawi. Hetih lai hian sorkar lam thuneitute chuan nau piang an pun theihna turin kawng hrang hrangin hma a la a, fa nei tharte tana ṭanpuina pek te, paternity leave rei zawk pek te, fa enkawl leh inchhungkhur hna thawhnaa mipate tih tur siamte leh thil dangte a siam a, mahse hei hian awmzia erawh a la nei thui lo hle thung.