Bahrain leh Israel-in inzawmna siam remti

US President Donald Trump chuan Persian Gulf ram, Bahrain chuan Israel nena inzawmna siam a, thawhdun an remti tih a puang. 

Hemi hma hian President Trump hmalakna bawkin United Arab Emirates (UAE) chuan Israel nena inzawmna siam hi a lo remti tawh bawk. Bahrain-in Israel nena an inkar boruak siamṭhat a remtih ve leh tak avangin Arab ram zingah Israel pawmtu palina a ni dawn ta a ni. Egypt leh Jordan ramte pawhin Israel hi inremna an lo siampui tawh bawk. 

Donald Trump chuan ni 30 chhungin Arab ram pahnihin Israel nena inremna siam an remti ta tih a twitter-ah a tarlang. Kumin January thla khan Trump hian Israel-Palestinian buaina chinfelna tura Middle East peace plan a siam chu a lo puang tawh a, hemi hmang hian Arab ram pahnihte hi Israel inremna siampui turin a hmin thei ta a ni. 

Israel prime minister Benjamin Netanyahu chuan Arab ram dang nena inremna an siam­pui leh thei tur chu a phurawm hle tih a sawi a, inrem­na a awm theihna turin kum tam tak an lo bei tawh tih a sawi. 

Bahrain leh Israel-in inremna siam an remti chu UAE chuan lawmawm a tih thu sawiin, Middle East bial tana thil pawimawh tak a nih thu a sawi. Hetih lai hian Palestinian official-te erawh an lawm lo hle a, Palestian foreign ministry chuan Bahrain-a an ambassor chu thu sawipui turin a ko nghal a ni. 

Gaza Strip-a roreltu, Pales­tinian pawl Hamas chuan he thil hi Palestinian-te tana thil pawi tak tur a ni tih a sawi bawk.