Germany President-in Parliament ṭhiat, February 2025-ah inthlanpui an nei dawn

Germany chancellor Olaf Scholz kaihhruai ṭangrual sorkar a tlak tak avangin president Frank-Walter Steinmeier chuan nimin khan an ram Parliament lower house a ṭhiat a, nakkum February 23-ah inthlanpui an nei ang.

President Steinmeier chuan hun harsa tak an tawh mekah, sorkar ngelnghet leh hna thawk thei an mamawh tih sawiin, inthlanpui buatsaih thuai chu an ram tana hma lam pan theihna tur kawng dik a nih thu a sawi. Inthlanpui neih hnuah pawh an ram harsatna neihte chinfel chu hmabak a ni dawn a ni, a ti.

Inthlanpui neih tur chu felfai tak leh langtlang taka nei turin a chah nghal a, "Democracy tan chuan pawn lam mi inrawlh hi thil hlauhawm a ni," tiin President chuan a sawi zui bawk.

Tun thla tir lam khan Parliament-ah Scholz kaihhruai ṭangrual sorkar chu no-confidence vote hmangin paihthlak a ni. Mahse inthlan neih hma chu Social Democrat hruaitu, Scholz hian caretaker sorkar chu a kaihruai zui ang. Mipui ngaihdan lakna hrang hrangah conservative lam chuan Social Democrats lakah point 10 chuangin hma an hruai mek a ni.