SKorea Parliament in acting President Han paihthlak rawtna pawm leh

South Korea politics buainain reh lam a la pan thei lo. An ram parliament, National Assembly-in president aṭanga Yoon Suk Yeol paihthlak rawtna a pawm hnuah, acting president atana ruat Han Duck-soo paihthlak rawtna chu nimin khan a pawm leh.

National Assembly-in President Yoon paihthlak rawtna a pawm hnuah, Constitutional Court-in a chungthu a ngaihtuah chhung atan acting president atan prime minister Han hi ruat a ni. Mahse eptu lamin an thunun, National Assembly chuan Han pawh hi president dinhmun a chelh mekna aṭangin paihthlak leh an duh ta a ni.

Han impeachment motion put luh hi 192-0 vote in a tlang a ni. Rorellai, People Power Party chuan vote lak hi an boycott a, speaker Woo Won Shik ṭhutna bulah kal khawmin vote lak dan chu dan kalh a ni tiin, Speaker hi bang turin an phut zui ve bawk.

Acting president Han chuan a laka impeachment motion put luh a ni chu pawi a tih thu a sawi a, hemi rual hian assembly thutlukna chu a zah thu sawiin, acting president a nih anga a chanvo pawh a tih tawp nghal tur thu sawi. Hemi rual hian paihthlak a nih dawn leh dawn loh chungchanga thutlukna siamtu tur, Constitutional Court chuan thutlukna fing tak a siam ngei beisei thu a sawi. Han paihthlak rawtna pawm a nih leh tak avangin, president hna lo chelh lailawk tur hian deputy prime minister leh finance minister, Choi Sang-mok chu ruat a nih rin a ni.