Afghanistan peace talk nei ṭan dawn
Afghanistan sorkar leh Taliban firfiak aiawhte chuan kum 20 chhung an lo indo tawhna titawp a, remna leh muanna a awm theihna tura inbiakna an nei ṭan dawn.
Inbiakna neih tur pual hian kar liam ta Inrinni khan Qatar khawpui, Doha-ah a bul ṭanna inkhawm buatsaih a ni a, Afghanistan High Council for National Reconciliation chairperson Abdullah Abdullah, Taliban deputy leader Mullah Abdul Ghani Baradar leh US Secretary of State Mike Pompeo te an tel. He inkhawm hawngtu Qatar foreign minister, Sheikh Mohammed bin Abdulrahman Al Thani chuan Afghanistan sorkar aiawh a tel turte chu rilru inhawng turin a chah a ni. Hei bakah hian Sheikh chuan hun kal tawha an intihthiam lohna te chu intheihnghilhsak tawn a, hma lam hun thlir turin a chah bawk. Vawiin aṭangin Afghanistan sorkar aiawh leh Taliban firfiak aiawh te chuan hmaichhanah inbiakna hi an nei ṭan ang.
Inbiakna an neih tum chungchangah hian Abdullah chuan kan inrem thei a nih chuan kan rama buaina kan neih mek hi a bo dawn a ni, a ti. Taliban deputy leader Baradar chuan Afghanistan ram chu independent ram leh developed ram ni se a duh thu a sawi a, Afghanistan-ah chuan Islamic kalphung hmanga inrelbawlna kalpui a duh thu a sawi ve bawk.
US Secretary of State Mike Pompeo chuan Afghanistan sorkar hnenah an politics kalphung chu an duhthlannaah a innghah thu a hrilh a, inbiakna nei tur pahnihte chuan an mawhphurna hriaa inremna an siam ngei theihna turin duhsakna a hlan bakah, ram hrang hrangte chuan inrem turin an duh reng thu Afghanistan sorkar leh Taliban-te chu a hrilh.
Kumin March thla khan remna zawnga inbiakna neih tura ruahmanna kalpui a lo ni tawh a, mahse jail tang chhuah chungchangah an inrem hleihtheih loh avangin inbiakna hi tihkhawtlai a ni ta a ni.