IS-in Boko Haram hruaitu thar ruat

Islamic State (IS) firfiak pawl chuan Nigeria rama helpawl Boko Haram hruaitu thar atan Abu Musab al-Barnawi a ruat a, helpawl kalphung pawh tihdanglam a nih tur thu a sawi.

IS official Arabic newspaper, al-Nabaa-ah hemi chungchang hi chhuah a ni a, Boko Haram-te chuan mosque bakah Muslim-te bazarna hmunpui te chu an bei tawh dawn lo tihte an sawilang. Helpawlte hian a hma chuan civil miten an tawrh tam theihna hmunahte pawikhawihna an lo thlen fo ṭhin a, mahse kalphung thar an neih turah chuan Kristian leh an sakhaw hmun pawimawhte an bitum tawh dawn tih an sawi.

Hruaitu thar atana ruat, Barnawi hi journalist a ni. Boko Haram aṭanga chhuak, Ansaru thlawptu a ni. An mi beihte thliar hrang lo a, Muslim mite beih tel an ni
ṭhin chu duh loin Ansaru pawl hi a inlahrang a ni. IS thuchhuahah hian helpawl hotu thar atana dah a nih chhan te, an pawl hotu ni lai mek Abu Bakar Shekau awm dan turte erawh tarlan tel a ni lo.

Shekau hian kum 2015, March thla khan IS an thlawp thu hi a lo puang tawh a, mahse IS nen an inzawm dan tak erawh hriatchian a ni lo. Shekau-a kaihhruaihna hnuaia kum sarih an awm chhungin, Boko Haram hian mi 20,000 chuang an that a, an pawikhawihna thlen avang hian mi maktaduai 2.2 vel chu an tlanchhe bawk. Kar kalta mai pawh khan Boko Haram-te hian mipuite chhawmdawlna tur phurtu motor beiin, civil mi pathumbakah UN hnathawk an that a ni. An pawikhawihna avag hian UN-in Nigeria hmarchhak lama chengte chhawmdawlna a pek ṭhin pawh a khaihlak phah a ni.