Trump-a ṭantuten Clinton-i man an phut

US Republican president candidate, Donald Trump-a ṭantute chuan Democratic president candidate Hillary Clinton-i chu thil dik lo taka tihnaa inhnamhnawihah puhin, man an phut.

Virginia-a campaign neihnaah Trump-a thlawptute Clinton-i chu US ram himna chungchang ngaihthahah an puh a, mipuite hnena dawt hrilh chingah puhin a dawt sawi chu an ngaihthlak duh tawh loh thu an sawi.

Clinton-i hi US Secretary of State a nih laiin security kaihhnawih sorkar thil pawimawh thawnna atan a private email a hman avangin sawisel a tawk nasa hle. Federal Bureau of Investigation hotu chuan tun hnaia thuchhuah siamin, Clinton-i hi thubuai siamsakna tur khawpa dan bawhchhiatna a nei lo tih a sawi a, hemirual hian sorkar thil pawimawha a private email a hmang chu a fimkhur lo hle a ni, a ti.

Donald Trump-a thlawptute chuan hemi chungchang hi beihletna atan hmangin an sawichhuak fo a, ram himna lam a ngaihthah avangin jail-a khung tlak nia an ngaih thu an sawi a ni.

Trump-a pawhin Florida-a a campaign-naah Clinton-i hi Islamic State firfiak pawl dintu a ni tiin, an rama firfiakten pawikhawihna an thlen hrang hrangte sawichhuakin, he thil hi a thlentir a ni, a ti. President nise chuan 9/11-a al-Qaida firfiakten World Trade Center an beih kha a lo dan theih tur thu a sawi. Republican party candidate chungchangah party mi leh sate an inlungrual tawk lo nia sawi chu chhangin, Trump chuan an inlungrual
ṭhat thu sawiin, party miten an thlawpna avanga a lawm thu pawh a sawichhuak bawk.