SKorea thlawhtheihna chesualah mi 179 thi

South Korea rama Muan International Airport-a khualzin phur thlawhtheihna ṭum tur chu an ram huna Pathianni zing lam dar 9:03 khan a chesual a, mi 179 an thi.

Thlawhtheihna chesual hi Boeing 737-800 jet, Jeju Air flight 7C2216 niin, khualzin 175 leh thawktu mi paruk an chuang. Thailand khawpui, Bangkok aṭangin Seoul khawpui chhim thlang lam, km 290 vela hla Muan International Airport-a ṭum tur a ni.

National Fire Agency chuan thi zinga mi 85 chu hmeichhia niin, mipa 84 an ni a, la hriatchian loh mi 10 an awm bawk niin a sawi. Mi pahnih nungdama chhanchhuah an ni a, crew member ve ve an ni. Agency chuan thlawhtheihna hi a ṭum hma deuh hian sava rual suin, landing gear lamah thil dik lo a awm niin a sawi.

Pathiannia chetsualna thlenga hi South Korea rama thlawhtheihna chetsualna thleng rapthlak ber a ni. SKorea sorkar chuan he chetsualnaa thite sunna hi ram pumah ni sarih chhung neih a nih tur thu a puang nghal bawk.

Chetsualnaa thi mi 179 zinga  mi 69 chauh chu an nihna hriatchian an la ni. He thlawhtheihnaa chuang zinga pahnih chu Thailand mi niin, a bak zawng chu South Korea mi an ni.

Jeju Air hian December 8, 2024 khan Muan International Airport aṭang hian Bangkok leh Asian ram khawpui dangah regular flight a thlawh tir chauh a, mahse kar thum lek hnuah chetsualna rapthlak tak hi an tawk ta a ni.