ICC-in Sudan President man turin SAfrica a nawr

International Criminal Court (ICC) chuan African Union (AU) sum­mit hmanga an rama cham mek, Sudan President Omar al-Bashir chu man turin South Africa a nawr.

Sudan President Bashir hi Sudan rama Darfur biala tualchhung indona thlengah civil mite chunga pawikhawihna nasa tak thlentirah puh a ni. Mahse an puhna hi thu dik lo niin Bashir chuan a sawi.

ICC-in man turin nawr mah se, South African official-te chuan Sudan President hi Johannesburg-ah lawm takin an lo dawngsawng a ni. President Bashir hi foreign minister leh official dangte'n an ṭawiawm.

AU leh ICC inkar boruak hi a ṭha vak lo a, AU chuan Africa mite bitum bikah court hi a puh. Hei bakah hian ram hruaitu dinhmun chelh laite laka thubuai siamsak lo turin a lo nawr tawh bawk.

ICC assembly of states presi­dent, Sidiki Kaba chuan Bashir man tura an ngenna hi South Afri­ca-in a zawm duh lo a nih chuan thil ṭha lo zawk a nghawng chhuah a hlauh­thawn thu a sawi.

Human rights organisation leh South Africa-a eptu party lian chuan Bashir hi man ngei turin sorkar an phut bawk.

Sudan-a Darfur bialah hian kum 2003 aṭang khan helho leh sorkar sipaite an inbei a, UN chuan tualchhung indona thleng avang hian mi 300,000 chuang an thi tawh tiin a tarlang. ICC chuan tualchhung buai thlen laia pawikhawihna thlen dan a chhui chu a titawp tawh a, mahse Bashir manna tur thupek a tihchhuah tawh chu kalpui zui zel a ni. Court chuan Sudan President hi a mihring puite laka pawikhawihna thlen, indona chhuak leh mi ṭhahnem tak thihnaa mawhphurtuah a puh a, mahse ICC hian police force hran a neih loh avangin, member state-te chungah a innghat thung.

Kumin AU Summit official theme atan hian 'Year of Women's Empowerment and Development' hman a ni. Thupui kaihhnawih bakah Burundi ram politics buaina, South Sudan tualchhung buaina leh tun hnaia South Africa rama ramdang mite dinhmun a him tawk lo nia sawi chungchangte pawh sawiho a ni ang. Hetihlai hian African Union meeting-ah hian Africa khawpui kaihhnawih leh thil buaipui mekte ngaihthah a ni fo ṭhin nia sawi a ni.