Egypt-in Gaza Strip ramri hawnsak
Egypt chuan thla thum chhunga a ṭum khatna atan Gaza Strip ramri chu Inrinni khan a hawng a, ni thum chhung Palestinian-te ramri kaltlanga an luh leh chhuah a phalsak.
Gaza Strip hi Palestinian helpawl, Hamas thununna hnuaia awm a ni. Ramri hi Israel leh Egypt chuan an kharsak a, a khat tawkin an hawnsak chauh ṭhin.
Kar hnih liamta khan Egypt hian ramri hi ni thum chhung a lo hawng tawh a, mahse Gaza Strip-a chengte an chhuah phalsak a ni lo a, Gaza pawn lama Palestinian mi tangkhangte tan Gaza-a an luh theihna atan chauha hawn a ni.
Egypt-in ramri a hawn hnu hian bus hmangin mi eng emaw zat chuan Egypt lam an pan a, hei bakah hian Cairo International airport aṭangin Gaza panin Palestinian mi eng emaw zat an thlawkchhuak bawk. Ramri hi ni thum chhung hawn tura tih ni mah se, an pawhsei rin a ni.
Gaza official-te chuan ramri hawn chhung hian Rafah kaltlangin Egypt leh Arab ram dang aṭangin Gaza-a lut tur mi 15,000 chhinchhiah an ni tawh tih an sawi a, an zingah hian zirlai bakah damlo mi 3,000 vel an tel.