MERS: SKorea hospital-ah service ṭhenkhat an titawp
South Korea rama Middle East Respiratory Syndrome (MERS) hri leng mek avangin nimin khan a hrileng darh ṭanna nia hriat, Seoul-a Samsung Medical Centre chuan non-emergency surgery zawng zawng a titawp a, damlo enkawl tur an admit dawn lo bawk.
Samsung Medical Center chuan SKorea-a MERS hri vei hmuhchhuahte an chhui chiannaah, an zinga 70 chuang chu an hospital aṭanga kai a ni tih hriatchhuah a nih avangin hri leng mek khuahkhirh hna thawk tur hian a insawrbing dawn tih an sawi.
SKorea-a MERS vei an hmuhchhuah hmasa ber chu May 20 kha niin, Middle East tlawha zin chhuak sumdawng mi pakhatin a rawn vei haw a, enfiah a nih dawn hian Samsung Medical Center- emergency ward hrang hrangah ni thum chhung a nghak a, heta ṭang hian hri hi a darh ta nia ngaih a ni.
Ministry of Health chuan nimin khan hri vei mi pasarih hmuh thar leh an nih thu sawiin, MERS vei finfiah tawh hi mi 145 an tling tawh a, an zinga 15 in an thihpui tawh bawk. MERS vanga thite hi kum upa lam leh, natna dang nei kawpte an ni.
Samsung Medical Center president Song Jae-Hoon chuan an hospital aṭanga hri leng a darh chu pawi an tih thu sawiin ngaihdam a dil nghal a, an mawhphurhnaah ngaiin hri leng mek khuahkhirh a nih theihna atan hian theihtawp an chhuah dawn tih a sawi.
Thuneitute chuan hospital dang pahnihah pawh hri hi a darh nia an hriat vangin damlo enkawl lai leh a thawktute pawh tlawhpawh theih lohin an dah rih a, hei bakah hian mi 4,856 vel chu an in leh damdawi-in ṭhenkhatah enfiah tura dahhran an ni bawk.