US President hlui Jimmy Carter a thi

US president hlui, Jimmy Carter chu kum 100 mi niin Pathianni, December 29, 2024 khan Plains, Georgia-a a chenna inah a thi.

Nobel peace laureate, US President 39-na Jimmy Carter hi kum 2023 February thla laihawl aṭang khan Plains-a a chenna inah hian enkawl a ni tawh a ni. He khua hi a pianna khua niin, Peach state governor a nih hmaa peanut farm a siamna hmun a ni.

Cater Center chuan Jimmy Carter hi thlamuang taka a kal thu sawiin a fapa, Chip Cater chuan a pa chu ama tan chauh 'hero' ni loin muanna, mihring dikna chanvo humhalh duhtu leh phut let nei lo hmangaihna ringtute tan pawh 'hero' a ni, tiin a sawi.

Cater hi kum 1977-1981 chhung khan US President niin, US president ni tawh zinga dam rei ber a ni. A president chhung hian human rights leh social justice lam a ngaipawimawh a, a kaihhruaina hnuaiah Israel leh Egypt inremna, Camp David Accords ziah a ni bawk. A president term zawh hnu, kum 1982 khan Carter Center dinin, social leh economic justice tan theihtawp a chhuah a, a hnathawh avang hian kum 2002 khan khawvel chawimawina ngaih hlut, Nobel Peace Prize pawh hlan a ni nghe nghe.

Kristian ṭha tak niin kum 90 chho a nih hnuah pawh an khua, Plains-a Maranatha Baptist kohhrana sunday school-ahte a zirtir ṭhin. Kum 2015 khan thluak cancer a vei tih hriatchhuah a ni. Kum 2023, November 19-ah a nupui, Rosalynn Carter chuan kum 96 mi niin a lo boralsan tawh bawk. A nupui vuinaah pawh hian chak lo takin, wheelchair-a ṭhuin a inlan a ni. Fa pali, mipa pathum leh hmeichhe pakhat an nei a ni.

US president Joe Biden chuan Jimmy Carter hi state funeral nen vuil a ni dawn tih sawiin, a vui ni tak tur erawh an la sawichiang lo. State funeral hian a tlangpuiin ni 7-10 chhung a awh a, stage pathum a awm a ni. A hmasa berah chuan President chenna ṭhinah hriatrengna hun buatsaih a ni ang a, a dawtah Washington-ah hun hmang lehin a final stage-ah President hluiin a vuina hun hman a duhnaah hun hi hman a ni leh dawn a, hei hi Plains khuaah hman a ni ang. A ruang erawh chu US Capitol-ah phum a ni dawn nia sawi a ni. January 9, 2025 hian an ram pumah sunna, National Day of Mourning hman a ni dawn a, hei bakah an ram puma sorkar building, sipai hmun leh naval station bakah navy lawnglianahte US flag chu ni 30 chhung President hlui sunna atan hian a ngul chanve-ah zar a ni bawk ang.