Taliban-in hmeichhe awmna thlir theihna tur tukverh siam khap

Afghanistan-a rorellai, Taliban supreme leader chuan thuchhuah siamin, chenna in sak tharah Afghan hmeichhia te awmna laite hmuh theihna tur tukverh siam a khap. In sak tawha tukverh lo siam tawhte pawh ping leh vek turin a ti.

Inrinni liam taa thuchhuah an siamah, Taliban sorkara thupuangtu. Zabihullah Mujahid chuan in sak tharah chuan courtyard, choka. tuichhunchhuah leh hmun dang, hmeichhiate chetvelna hmu thei tura tukverh siam khap tlat a ni, a ti. "Choka-a hmeichhiate hnathawk lai, kawtzawla an che vel leh tuichhunchhuah aṭanga tui an chawi lai lo thlirte chu pawikhawihna lian tak a tling thei dawn a ni," tiin a sawi.

Municpal thuneitute leh a kaihhnawih department-te chuan in sak tharte hian an ṭhenawmte in chhung  an hmuh theih leh theih lohte an enfiah zel dawn a ni. In ding tawh saa ṭhenawmte in chhung leh kawt vel hmuh theihna tukverh a lo awm a nih chuan, an pin loh pawhin bang siam hnan tura tih an ni bawk ang.

Kum 2021-ah Afghanistan-a Taliban sorkar a din leh aṭang khan hmeichhiate khuahkhirhna dan hrang hrang an siam chho a, hmeichhiate chu primary education aia sang an zir an khapsak bakah, office-a an thawh a khap a, park leh vantlang hmun danga an kal chungchangah khuahkhirhna khauh tak an siam tawh bawk. Tun hnaia dan thar an siamah chuan hmeichhiate chu mipui hmaa an zai leh hlachham mi an sawi pawh khapsak an ni leh a, radio station-te pawhin hmeichhe aw an ti chhuak tawh lo a ni.