IS ten Iraq security post an bei

Islamic State (IS) firfiakte chuan Iraq khawpui, Baghdad hmarlama security post-ah thihchilh bomb an tipuak a, mi 13 an thi.

Inrinni khan al-Hajaj biala sipai headquarters security checkpoint pahnihah firfiakte hian car bomb an tipuak a, Shiite hel leh sipai 13 an thih bakah midang 24 in hliam an tuar.

Al-Hajaj hi Salahuddin province-a Beiji leh Tikrit inkara awm a ni. Firfiak leh sorkar sipaite hi hun eng emaw chen an inbei tawh a, sorkar sipaite hi Shiite helte hian an thlawp.

Police-te chuan security force-te hian IS firfiakte'n Garmna khaw bula thihchilh bomb tihpuak tuma an beihna chu an lo dang thei niin an sawi.

Tun hnaiah US anti-tank missile hmangin firfiakte'n police leh security force-te beihna atana car an hman ṭhin chu eng emaw zat tihchhiatsak an ni. Iraq security force-te chuan Shiite helpawl leh US kaihhruai ṭangrual pawlte thlawpnain, IS-te'n Iraq-a ram an lakte chu lakkir leh tumin an bei mek a ni.