MERS vanga thi an punbelh zel

South Korea ram­­­ah Middle East Res­pira­tory Syn­drome (MERS) hri leng vanga thi an pun belh zel a, nimin thleng khan he hri leng vanga thi hi mi 16 an tling tawh a, mi dang panga-in hri an vei thar tih hmuh­chhuah a ni bawk.

Official-te chuan SKorea-ah hian MERS hri vei finfiah tawh hi mi 150 an tling tawh tih an sawi.

Hri darh ṭanna, Sam­­sung Medical Center president Song Jae-hoon chuan mipuite hnenah ngaih­dam dilna a tichhuak a, an hospital-ah chuan pawn lam mi dam­lo an lakluh belh dawn rih lo tih a sawi a, hei bakah hian hos­pital chu pawn lam mite'n an tlawh an phal rih dawn lo tih a sawi bawk. He rua­hmanna hi June 24-ah an ennawn leh dawn a ni. MERS hri vei fin­fiah tawh zinga mi 70 chu Samsung Medical Center aṭanga kai an ni.

MERS hi tlang hri leng, hritlang leh Sars (servere acute respiratory syndrome) ang chi a ni a, kum 2012 khan Middle East-ah hmuh­chhuah a ni a, Saudi Arabia ramah a hluar nasa ber. Eng angin nge a inkaichhawn tak hriatchian a ni lo a, mahse a vei tawhte khuh leh hahchhiau aṭangin hri hi a darh nia rin a ni. A veite hi an khua a sik a, an khuh bakah thawk lamah harsatna an nei a, pneumonia leh kal ṭhat lohna thlengin a thlen thei a ni. MERS vei tawh zinga 36% hian an thihpui a, tun thlengin a enkawlna tur bik damdawi emaw, vaccine emaw a la awm lo.