Georgia-ah sahuana ramsate an chhuak

Georgia khawpui Tbilisi-ah chuan tuilianin khawpuia sahuan hungna a lenchhiat avangin sahuan ramsate an vakchhuak a, mipuite chu an sahimna atana pawn chhuak lo turin hriattir an ni. Kawtthlerah ramsa vakchhuak zingah hian sakei, sihal, savawm leh samakte an tel.

Tuilian vang hian Tbilisi khaw­puiah mi pakua an thi a, an zinga pathum chu sahuana thawk an ni.

Tbilisi khawpuiah hian ruah nasa taka a sur bakah thlipui a tleh tel a, ruahsur nasa vang hian khawpui kal tlanga lui awm chu nasa takin a lian a ni.

Sahuana thawkte chuan ramsa vakchhuakte hi zawnkhawm hna an thawk nghal a, Pathianni khan Tbilisi main square-ah samak pakhat chu hualin, damdawi hmanga an kah hnuah an hruai kir leh thei a ni. Police-te pawhin ramsa ṭhenkhat an man tawh a, mihring tana hlauhawm thei nia an hriatte chu an kaphlum bawk. Hetihlai hian ramsa zingah hian man loha khawpuia vak darh hi eng zat chiah nge la awm tih hriat a ni lo.

Thawktute chuan sahuana ramsa enkawl mek 600 zinga a zahve vel chu an vakchhuak tih an sawi a, thawktute leh police-te'n an zawng mek a ni. Hetihlai hian helicopter hmangin khawpuia cheng mipuite chu kawtthlera vahchhuah a him loh hriattirin, an in chhuahsan rih lo tura ngen an ni.