SKorea police-ten President Yoon man tumna ti tawp

South Korea police-te chuan a chungthu ngaihtuah a nih dawn avanga an ram president aṭanga chawlh lailawk tir mek, Yoon Suk Yeol man an tumna chu a security team nen darkar ruk vel an inep hnuin an ti tawp ta rih.

Yoon hi 2024 December thla tir lama an rama sipai hnena thuneihna sang pekna tur, martial law a puan avangin a thuneihna hmang dik loa puhin, an ram Parliament-ah President a nihna aṭanga paihthlak rawtna pawm a ni. Hei vang hian President a nihna aṭangin chawlh tir a ni a, Constitutional Court-in a chungthu hi a ngaihtuah dawn a ni.

Court in thu zawhfiah tura a kohna chu vawi thum chu Yoon hian zawm loin a inlan duh lo a, hei vang hian tun kar tir lam khan Seoul court chuan manna tur thupek hi a ti chhuak a ni. Mahse man tuma police kalte hi Yoon security team chuan an lo dang a, nimin zing khan central Seoul-a Yoon chenna kawtah police van eng emaw zat an intlar. Police hi team 20 niin mi 150 vel an ni a, an zinga a zahve vel chuan Yoon compound hi lut mah se, amah ventu security officer-ten an lo dang a ni. Human wall lo siamin, police team kalna turah motor-te an lo dah bawk. Yoon hi President a nihna aṭanga chawlh tir ni mah se, a security officer-te a ven hna an la thawk chhunzawm reng a ni.

Corruption Investigation Office (CIO) chuan Yoon hi a security team lamin an ven tlat avangin man mai theih a ni dawn lo niin a sawi a, court thupek a zawm duh lo chu pawi an tih thu sawiin, hma lak zel dan tur an la ngaihtuah leh dawn tih a sawi.

Yoon thlawptu mi eng emaw chu a chenna kawtah an inkulh ve reng bawk a, police lamin man an tumna an ti tawp chu lawmin, hnehna an chang ta tiin an au zui bawk.