Hamas-in Israel mi an hren mek video ti chhuak

Palestinian firfiak pawl, Hamas armed wing, Ezzdine al-Qassam Brigades chuan Inrinni liam ta khan Israel sipai an hren mek, Liri Albag-i video an ti chhuak.

Liri Albag-i hi kum 2023, October 7-a Hamas ten Israel an beih ṭuma an man zinga mi kha niin, Gaza-ah an hreng a, ni 450 chuang an hreng tawh a ni. Video hi minute thum leh a chanve vela rei niin, kum 19 mi Albag-i hian Hebrai ṭawngin Israel sorkar chu a chhuah theihna tura hma la turin a ngen.

Hamas mi hren mekte chhuah an nih theihna tura an chhungten campaign group an din, Hostages and Missing Families Forum chuan he video tih chhuah a nih hnuah hian thuchhuah siamin, Israel Prime Minister, khawvel ram dang hruaitu leh thutlukna siam theitu zawng zawngte hnenah, an fate dinhmun anga chana thutlukna fel tak tan siam a hun tawh thu an sawi zui ve nghal a ni.

Albag-i hi Palestinian firfiakte hian Gaza border, Nahal Oz base aṭangin hmeichhe dang paruk nen Hamas hian an man a, an zinga panga hi hren mek an la ni. Hamas leh an thurualpui, Islamic Jihad chuan Gaza Strip-a Israel nen thla 15 zet an inbeih tawh chhung hian Israel mi an hren mekte video hi ṭum eng emaw zat an lo ti chhuak tawh a ni. Kum 2023-a Israel an beih ṭuma an mi man, mi 251 zinga mi 96 chu Gaza-ah an la kawl nia hriat a ni. Hetih lai hian Israel chuan Hamas hoin an man zinga mi 34 chu an thi tawh niin a sawi thung.

Hamas hian Israel nena inkahhai puan leh, an mi hren mekte chhuahna tura inremna siam tura inbiakna chu Qatar-ah chhunzawm a ni dawn tih a sawi a, mahse a ni tak erawh a sawi lang lo. Palai hna thawktu, Qatar, Egypt leh US aiawhte chuan thla eng emaw zat inremna siam a nih theihna atan hma la tawh mah se, tun thlengin Gaza Strip-a indona hi a la tawp thei lo a ni.

Hostage forum pawhin Hamas mi hren mekte chhuah an nih theihna atana inremna siam thuai tura Israel sorkar nawrin kar tin nawrh an huaihawt a, Inrinni liam ta pawh khan Tel Aviv-ah nawrh hi huaihawt lehin, Israel prime minister Benjamin Netanyahu chu inremna ti fel thuai turin an phut.