Myanmar sipai sorkar tang 5,800 chuang a chhuah

Myanmar sipai sorkar chuan January 4-a an independence day an lawm tak pualin tang 5,864 chu ngaidamin chhuah zalen an ni tih Inrinni liam ta khan a puang.

Thuchhuah an siamah, tang chhuah tur zingah hian ram dang mi 180 an tel a, heng mite hi chhuah an nih veleh an ram lama thawn kir an ni ang. Ram dang mi chhuah zinga a tam ber hi Thailand mi an ni. Damchhung tang tura hrem mi 144 te cu an tan hun hi kum 15-ah tih nep sak a ni bawk. Heng bakah tang dang zawng zawng chu an tan hun chhung hmun ruka ṭhena hmun khata tih tlem sak vek an ni.

Tang chhuah zinga tam tak hi February 2021-a sipai chakna hmanga civil sokar paihthlak a nih dodal a, lungawi lohna lantir an mante an ni. Tang an ngaihdam takte hi dan kalh zawnga che a man an nih leh chuan, a hmaa hremna pek an lo nih tawh ang khan an lakah lekkawh zui leh a ni dawn a ni. Inrinnia tang chhuah zingah hian Kachin state chief minister hlui, Khet Aung pawh a tel. Sipaiten thuneihna an chan hnuah, kum 2022 khan Khet Aung hi manin, eiruk thubuai siamsak a ni a, kum 12 tang tura hrem a ni.

Myanmar hian an ram hun pawimawh leh Buddhist festival pualin tang sang tel a lo ngaidam fo ṭhin. Nikum khan Independence Day pualin tang 9,000 chuang ngaihdam an lo ni tawh bawk.

Assistance Association for Political Prisoners chuan kum 2021-a sipaiten thuneihna an chan aṭangk han mi 28,096 man an ni tawh a,n an zinga mi 21,499 chu hren mek an la ni tih Zirtawpni liam taa report a tih chhuahah a tarlang.