Ram hrang hrangin China-a HMPV leng an ngaihven

China ramah Human Metapneumovirus (HMPV) a leng leh mek a, he hri hi thawk lama harsatna siam thei niin, a lan chhuah dan pawh Covid-19 hri nen an in ang. He hri leng hi China ṭhenawm ramte bakah khawvel ram hrang hrangin ngaihvenin an thlithlai mek.

Hetih lai hian China chuan HMPV chu kum 2001-a hmuh chhuah tawh niin, thlasik laiin a hluar ṭhin niin a sawi. Hlauhthawn tur awm loh thu leh, ram dang mite tan pawh China rama zin a him thu China foreign ministry thupuangtu, Mao Ning chuan a sawi. China sorkar chuan a ram mipuite leh, an rama khualzinte hriselna chu a ngaih pawimawh thu a sawi bawk. Social media lamah hri kai an tam avangin hospital hrang hrang pawh an buai leh tawh hle nia sawi awm mahse , official report erawh chuan hetiang lam report hi engmah a la awm lo thung. December 16 - 22, 2024 khan hri kai erawh an pung nasa hle tih chu National Disease Control and Prevention Administration (NCDPA) chuan a sawi a, mahse kum 2024 thlasik lai ai chuan vei zat hi an tlem a rinawm thu a tarlang.

China rama HMPV leng mek chungchangah World Health Organisation (WHO) chuan thuchhuah engmah a la siam lo a, WHO leh China sorkar pawhin emergency an la puang lo. Mahse China ṭhenawm ramte erawh an fimkhur nghal hle a, an ram lut leh chhuakte uluk takin an endik a ni. Hong Kong-ah HMPV vei hi tlem azawng hmuh a ni tawh nia sawi a ni.

HMPV lan chhuah dan hi flu ang deuh niin, khuh, khawsik, hnarping leh hnaptui leh thaw chham hma angtein a lang a ni. A bikin kum upa lam leh naupang bakah, immune system chak loten an kai hma a ni. He hri kai zinga ṭhenkhat chuan bronchitis leh pneumonia thlengin a vei theih phah a, a bikin hei hi naupangah bik nia sawi a ni bawk. Vaccine a la awm lo a, a vei tam zawk hi la na vak lo, in lama inenkawl dam mai theih a ni.